«Агросубсидия» ахборот тизими тўғрисидаги низом тасдиқланди
21.12.2022 | 15:36
594
Ҳукумат қарори билан «Агросубсидия» ахборот тизими орқали қишлоқ хўжалиги маҳсулотлари ишлаб чиқарувчиларни давлат томонидан қўллаб-қувватлаш ва субсидия олишга талабгорларнинг аризаларини кўриб чиқиш ва уларга субсидия ажратиш тартиби белгиланди
«Агросубсидия» ахборот тизими тўғрисидаги низом тасдиқланди

Вазирлар Маҳкамасининг 2022 йил 16 декабрдаги 711-сон қарори билан «Агросубсидия» ахборот тизими орқали қишлоқ хўжалиги маҳсулотлари ишлаб чиқарувчиларни давлат томонидан қўллаб-қувватлаш ва субсидия олишга талабгорларнинг аризаларини кўриб чиқиш ва уларга субсидия ажратиш тартиби белгиланди.

Хусусан, Қишлоқ хўжалиги вазирлиги ҳузуридаги “Агросаноатни рақамлаштириш маркази” давлат муассасаси «Агросубсидия» ахборот тизимининг оператори ҳисобланади.

Агросубсидия” тизимининг асосий вазифалари қуйидагилардан иборат:

  • талабгорлар томонидан субсидия олиш учун аризалар электрон шаклда юборилишини ҳамда ушбу хизматдан хавфсиз ва кафолатли фойдаланишни таъминлаш;

  • талабгорларга уларнинг манзилли рўйхатга кириши ёки субсидия олиш учун юборилган аризаларни кўриб чиқишнинг ҳолатини ва босқичларни кўриб бориш имкониятини яратиш;

  • талабгорларга улар томонидан юборилган аризалар ваколатли давлат бошқаруви органлари ва бошқа ташкилотлар томонидан кўриб чиқилиши натижаларини кузатиб боришни таъминлаш;

  • ваколатли органлар томонидан талабгорлар юборган аризаларни кўриб чиқиш ва уларга электрон шаклда хулоса бериш.

Шунингдек, қишлоқ хўжалиги маҳсулотлари етиштирувчиларни қўллаб-қувватлаш учун субсидиялар «Агросубсидия» ахборот тизими орқали берилади. Ваколатли давлат бошқаруви органлари ва бошқа ташкилотлар талабгорларнинг тижорат банкларидаги ҳисобварағига субсидияни «УзАСБО» дастурий мажмуаси орқали ўтказиб беради.